Kongo dhe Ruanda do të nënshkruajnë një marrëveshje paqeje në Uashington më 27 qershor, tha të mërkurën një njoftim i përbashkët për shtyp nga vendet dhe Departamenti Amerikan i Shtetit.
Të dyja vendet kanë rënë dakord për kushtet e marrëveshjes që synojnë t’i japin fund luftimeve në Kongon lindore.
Kongo e ka akuzuar Ruandën se mbështet rebelët e M23 në lindje të vendit. Ekspertët e OKB-së thonë se rebelët mbështeten nga rreth 4,000 trupa nga vendi fqinj.
Konflikti që zgjati disa dekada u përshkallëzua në janar , kur rebelët e M23 përparuan dhe pushtuan qytetin strategjik kongolez të Gomës, i ndjekur nga qyteti i Bukavu-së në shkurt.
Draft-marrëveshja përfshin “dispozita mbi respektimin e integritetit territorial dhe ndalimin e armiqësive; shkëputjen, çarmatimin dhe integrimin e kushtëzuar të grupeve të armatosura jo-shtetërore”, thuhet në deklaratën e përbashkët, ka raportuar AP.
Marrëveshja që do të nënshkruhet përfshin gjithashtu një angazhim për respektimin e integritetit territorial dhe integrimin e kushtëzuar të grupeve të armatosura jo-shtetërore.
M23 është një nga rreth 100 grupet e armatosura që kanë luftuar për një pikëmbështetje në Kongon lindore të pasur me minerale, pranë kufirit me Ruandën.
Konflikti ka krijuar një nga krizat më të këqija humanitare në botë dhe ka zhvendosur më shumë se 7 milionë njerëz.
