Policia e Kosovës me urdhër të Prokurorisë Themelore të Prishtinës, kreu një bastisje mëngjesin e sotëm në lagjen “Bajram Bahtiri” në Prishtinë.
Synim kishin arrestimin e një të dyshuari për përfshirje në konfliktin mes familjeve “Sekiraqa” dhe “Capat”, ku kishte mbetur i vdekur Premtim Gashi.
Megjithatë, televizioni mëson se policia nuk ia arriti ta gjejë personin e kërkuar.
Mirëpo, ia doli që ta arrestoj vëllaun e të arratisur, Erd Marevcin, i cili gjithashtu dyshohet për përfshirje në konflikt.
Gjatë aksionit është gjetur edhe një armë zjarri e cila dyshohet se është përdorur gjatë përleshjes midis dy familjeve.
“Gjatë bastisjes, është arrestuar një person për veprën penale Vrasjes së rëndë në tentativë sipas nenit 173 lidhur me nenin 28 dhe 31 të Kodit Penal të Republikës së Kosovës, si dhe Mbajtja në pronësi, kontroll ose posedim të paautorizuar të armëve nga neni 366 të KPRK-së. Poashtu, gjatë kontrollit në vendin e ngjarjes është gjetur dhe sekuestruar një armë zjarri e tipit pistoletë, për të cilën dyshohet se mund të jetë përdorur në kryerjen e veprës penale”, thuhet në grafikën e Prokurorisë Themelore në Prishtinë
Prokuroria tutje ka bërë të ditur se hetimet janë duke vazhduar në koordinim të plotë ndërmjet Prokurorisë dhe Policisë së Kosovës, për zbardhjen e plotë të rrethanave të kësaj ngjarje.
Tëvë1 ka mësuar se Erd Marevci është dënuar edhe në vitin 2021 për armëmbajtje pa leje, nga Gjykata Themelore e Prishtinës.
