Një ditë pasi iu vu dryni, erdhën sërish.
Zyrtarët e Agjencisë Kosovare të Privatizimit u panë të mërkurën në Banjskë të Zveçanit.
Aty kryen një kontroll tek kompleksi Ranjska Banja i cili tashmë ka kaluar në menaxhim të AKP-së.
Gjatë pasdites, aty u pa edhe ky kamion i Agjencisë së Ushqimit dhe Veterinarisë.
Zyrtarët e AUV-it sekuestruan një sasi të mishit i cili dyshohet se ka qenë me afat të skaduar brenda këtij kompleksi. Përgjatë gjithë kohës sa ishin prezent këtu zyrtarë të AKP-së, u asistuan nga pjesëtarët e Njësisë Speciale të Policisë.
E pas përfundimit të aksionit, këtyre komplekseve iu vu dryni sërish.
Për këtë çështje, foli edhe ministri i Punëve të Brendshme, Xhelal Sveçla ku tha se në këtë kompleks është investuar jashtëligjshëm. Madje, ai theksoi se tash e tutje ky objekt do të jetë në menaxhim të MPB-së dhe MAPL-së deri në një vendim tjetër.
“Për këtë [pronësinë] nuk ka asnjë dyshim. Pse dikush ka investuar jashtëligjshëm, mendoj qe është mësim për të gjithë ata, të cilët dëshirojnë të investojnë jashtëligjshëm, se nuk mund ta bëjnë. Sa i përket menaxhimit të atij kompleksi, Ministria e Punëve të Brendshme është rezultat i bashkimit të dy ministrive, të Ministrisë së Punëve të Brendshme dhe Ministrisë së Administratës Publike, e ish-Ministria e Administratës Publike e ka departamentin e menaxhimit të objekteve të këtilla, në pronësi të shtetit. Kjo është arsyeja pse e kemi marrë në menaxhim, dhe destinacionin final këtij objekti, do t’ia paracaktojmë ndërkohë”, tha Sveçla.
Hapjen e hotelit në Banjskë e kishte bërë Marko Gjuriq, që aktualisht është ambasador i Serbisë në SHBA.
