Kroati Luka Modric nuk do të largohet nga Real Madridi këtë verë, pasi ka rinovuar kontratën me ekipin spanjoll.
Të hënën, Reali ka bërë të ditur se Modric e ka rinovuar për një vit kontratën që i skadonte në fund të këtij muaji. Me rinovimin e kontratës, mesfushori do të jetë pjesë e Real Madridit të paktën deri në fund të edicionit të ardhshëm. Ai ka refuzuar ofertat joshëse nga Arabia Saudite për të qëndruar në “Santiago Bernabeu”.
37-vjeçari është pjesë e Realit prej vitit 2012, ndërsa përgjatë kësaj periudhe, ai ka regjistruar 488 ndeshje në të gjitha garat dhe ka fituar hiq më pak se 23 trofe. Po ashtu, si futbollist i klubit spanjoll, Modric e ka fituar edhe “Topin e Artë” dhe është shpallur futbollisti më i mirë për vitin 2018 nga FIFA. Edicionin e fundit, Modric pati 6 gola e po aq asistime në 52 ndeshje të luajtura në të gjitha garat për Realin.
