Këtë alarm të hënën e ngriti Asociacioni i Komunave të Kosovës.
Kryetari i Komunës së Suharekës, Bali Muharremaj thotë se pa këtë qarkore nuk mund të planifikohet buxheti për vitin e ardhshëm për komunën që ai drejton.
“Arsyeja pse ne jemi ankuar është se ne më 1 shtator duhet ta dorëzojmë në organin tonë më të lartë që është Asambleja Komunale. Ajo është me ligj e paraparë. Në qoftë se nuk e dorëzojmë me një shtator atëherë kemi performanca negative si komunë. Ne tash në momentin që e marrim qarkoren apo kornizën e dytë duhet të dalim në terren, i kemi dëgjimet publike me qytetarët dhe duhet ta përmbyllim”, deklaroi Muharremaj.
Krahas moslëshimit të qarkores buxhetore, kryetari i komunës së Vushtrrisë, Ferit Idrizi thotë se komunën e tij po e penalizon fakti që nuk ka rishikim të buxhetit.
“Një çështje tjetër e cila do të paraqet vështirësi në shpenzimin e buxhetit është edhe rishikimi i buxhetit. Nuk e di nëse do të ketë sivjet rishikim nga ana e Ministrisë së Financave sepse ajo do të na kishte ndihmuar shumë që mjetet e mbetura prej projekteve t’i alokojmë për projekte të cilat i kemi planifiku dhe nuk kemi pas buxhet”, tha Idrizi.
Për gjendjen me buxhetet komunale që kanë mbetur pezull, kryetari i Partisë Demokratike të Kosovës, Memli Krasniqi e ka fajësuar kryeministrin Albin Kurti.
“Tani, nëse Qeveria nuk e merr parasysh kërkesën e Asociacionit të Komunave të Kosovës për ta lëshuar Qarkoren e dytë Buxhetore sa më parë para datës 1 shtator, në afatin e paraparë kur komunat duhet ta dorëzojnë buxhetin për miratim në Kuvendet e Komunave – ajo me qëllim po e zvarritë realizimin e shumë projekteve në interes të qytetarëve anekënd Kosovës, theksoi Krasniqi.
Ndërsa për mosrishikimin e buxhetit ka shkruar deputeti i LDK-së, Avdullah Hoti i cili ka thënë se kjo do të ndikojë negativisht në ekonomi, punësim e të ardhura.
“Me këtë dinamikë shumë të ulët të realizimit të buxhetit në gjashtë muajt e parë, dhe në mungesë të rishikimit të buxhetit, është e sigurt se zbatimi i projekteve kapitale sivjet do të jetë shumë i ulët. Kjo do të nënkuptojë qindra miliona mungesë në qarkullimin ekonomik në vend, që do të ndikojë negativisht rritjen ekonomike, punësimin dhe të ardhurat e përgjithshme”, tha Hoti.
Por të gjitha këtyre aludimeve gjatë ditës iu është përgjigjur ministri i Financave Hekuran Murati. Ai ka thënë se qarkorja e vitit 2023 nuk mund t’i bllokojë investimet për vitin 2022 teksa ka shtuar se ministria ka ndarë 654 milionë euro buxhet për komunat për vitin 2023.
Raporti i gazetarit Gojart Jashari.
