Kryetarët e komunave sot kanë pasur një takim me kryeministrin Albin Kurti, ministrin e Financave, Hekurat Murati dhe ministrin e Administrimit të Pushtetit Lokal, Elbert Krasniqi. Në këtë takim pati debat për kontratën kolektive, ku Komunat kërkuan rimbursim nga Qeveria për këtë. Mirëpo ministri Murati tha se kjo nuk është e mundur, derisa shtoi se është bërë zgjidhje për mësimdhënësit e Komunës së Vitisë. E kryetari i kësaj komune shprehet se duhet një zgjidhje afatgjate nga Qeveria.
Kontrakta kolektive shkaktoi debat të martën mes ministrit të Financave, Hekuran Murati e kryetarëve të Komunave.
Agim Aliu, Kryetari i Asociacionit të Komunave të Kosovës tha se nga kjo po sfidohen çdo ditë të punës së tyre, me jostabilitet financiar, pamjaftueshmëri buxhetore, pengesa e bllokada sistematike.
Ai kërkoi nga ekzekutivi që të bëjë rimbursimin e tyre për shkak se Komunave u janë marrë afro 115 milionë euro si pasojë e obligimeve financiare.
“Qeveria e Republikës së Kosovës të rimbursoj mjetet e shpenzuara deri më tani nga komunat për obligimet financare që rrjedhin nga kontratat kolektive. Të mos lejohet bllokimi i xhirollogarive të komunave për arsye të përmbarimeve si rrjedhojë e obligimeve të kontratave kolektive”, tha Aliu.
E ministri i Financave, Hekuran Murati tha se një kërkesë e tillë nuk mund të realizohet nga Qeveria për shkak se nuk ka mjete buxhetore.
Derisa shtoi se për mosekzekutimin e pagave për mësimdhënësit e Vitisë, është gjetur një zgjidhje afatshkurtër për këtë muaj.
“Sa i përket muajve të ardhshëm duhet të shohim pra se cilat janë mundësitë dhe kapacitetet në mënyrë që edhe ne t’iu asistojmë si Ministri e Financave kudo që ka nevojë, sa i përket gjetjes së mënyrës së rialokimit të mjeteve brenda për brenda kufijve buxhetorë që keni në mënyrë që të mos hasim në pengesa apo në raste të mos mundësisë së ekzekutimit të pagave”, tha Murati.
Por një zgjidhje e tillë, kryetari i kësaj Komune thotë se vetëm sa ka shkaktuar dëme tashmë të mëdha financiare.
“Kemi provu me gjetë zgjidhje që bile për këtë muaj pagat e sektorit të arsimit me u pagu si fleksibilitet edhe nevojë natyrisht për shkak se janë qytetarë të Komunës sonë dhe janë një obligim. Përndryshe nuk është zgjidhje kjo absolutisht, as nuk është zgjidhje afatshkurtër as afatgjatë, zgjidhja afatgjate është rimbursimi dhe marrja e përgjegjësive të atij që ka nënshkruar që i bie Qeverisë”, tha kryetari i Vitisë, Sokol Haliti.
As të martën e 8 tetorit, rreth 800 mësimdhënësve të Komunës së Vitisë nuk u janë ekzekutuar pagat për muajin shtator.
