Kryetari i AKK-së, Sazan Ibrahimi, tha përmes një njoftimi për medie se ky problem po ndodh për shkak të ngarkesës së serverëve në komuna.
“Sipas zyrtarëve komunalë, kjo po ndodh kryesisht për shkak të problemeve apo ngarkesave në serverat që mirëmbahen webfaqet e komunave dhe të problemeve të natyrës së tillë, e të cilat janë tërësisht në nivelin qendror”, thuhet në njoftimin e AKK-së.
Sipas njoftimit, kjo gjë ndëshkon Komunat, sidomos gjatë procesit të vlerësimit të transparencës, gjatë vlerësimit të performancës komunale dhe në procesin e publikimit të dokumenteve për konsultimet me publikun.
“Komunat e Republikës së Kosovës, ende janë duke u ballafaquar me probleme në fushën e teknologjisë informative, mosfunksionimin e webfaqeve të Komunave dhe kjo po vështirëson punën në kryerjen e detyrave të përditshme.
Kështu problemet me webfaqe në Komuna po kanë efekt edhe në afate ligjore të Komunave në shume procese, pastaj qytetarët po ankohen për mungesë transparencë dhe kështu ky problem është bërë pengesë e jashtëzakonshme në kryerjen e punëve ditore të Komunave të Republikës së Kosovës”, thuhet në njoftim.
Lidhur me këtë problem, Asociacioni i Komunave të Kosovës i ka dërguar disa kërkesa Ministrisë së Administrimit të Pushtetit Lokal, por pa ndonjë efekt pozitiv në këtë drejtim, thuhet në reagimin e AKK-së.