Komuna e Prishtinës ka njoftuar se të mërkurën më 19 nëntor procesi mësimor do të rifillojë normalisht në të gjitha institucionet edukativo-arsimore në kryeqytet, pas konstatimit se situata me reshjet është e qëndrueshme.
Komuna e Prishtinës sot nuk zhvilloi mësim pas paralajmërimeve për vërshtime të mundshme nga reshjet e shiut.
Në njoftim, Komuna e Prishtinës ka bërë të ditur se gjatë natës intensiteti i reshjeve pritet të bjerë.
“Nesër, procesi mësimor rifillon normalisht në të gjitha institucionet edukativo-arsimore të qytetit dhe të fshatrave të Prishtinës. Bazuar në vlerësimin e Shtabit Emergjent, informacionet e fundit nga Instituti Hidrometeorologjik i Kosovës dhe koordinimin me drejtoritë përkatëse të Kryeqytetit, është konstatuar se situata është e qëndrueshme për zhvillimin e rregullt të mësimit. Intensiteti i reshjeve gjatë natës pritet të bie dukshëm sipas vlerësimeve të fundit të IHMK-së, ndërsa ekipet emergjente janë në terren dhe po sigurohen që infrastruktura shkollore të jetë plotësisht e gatshme”, thuhet në njoftim.
