Nënkryetari i Komunës së Prishtinës, Shkëmb Manaj, ka njoftuar se Komuna i ka dërguar sërish kërkesë Ministrisë së Financave për zhbllokimin e buxhetit të Kryeqytetit, i cili sipas tij po mbahet peng në mënyrë të kundërligjshme.
Sipas Manajt, rreth 33 milionë euro, përfshirë 23 milionë të hyra vetanake dhe 10 milionë euro nga granti qeveritar janë bllokuar nga ministri i Financave, Hekuran Murati, dhe bashkëpunëtorët e tij, në kundërshtim me ligjin dhe Kushtetutën.
“Adresa e vetme e bllokimit të buxhetit të Prishtinës është Hekuran Murati dhe partia e tij në pushtet. Tjerat çfarë thotë ai në statuse në facebook, janë gënjeshtra të mëdha dhe tentim për ti ikur përgjegjësisë penale. Sot ia kemi dërguar shkresën e radhës Ministrisë së Financave për zhbllokimin e buxhetit të Kryeqytetit! 33 milion euro, prej të cilave rreth 23 milion të hyra vetanake dhe 10 milion të grantit qeveritar janë bllokuar nga Hekuran Murati me bashkëpunëtoret e tij në kundërshtim me ligjin dhe kushtetutën”, ka shkruar Manaj në Facebook.
Manaj ka theksuar se buxheti i Prishtinës është pjesë e Ligjit për Ndarjet Buxhetore për vitin 2025, duke shtuar se Murati dhe bashkëpunëtoret e tij do të përgjigjen para drejtësisë për këtë çështje.
“Ai dhe bashkëpunëtoret e tij do të përgjigjen para drejtësisë, derisa e bllokojnë buxhetin e Prishtinës i cili është përfshirë në Ligjin për Ndarjet Buxhetore të vitit 2025”, ka përfunduar Manaj./teve1.info/
