Komuna e Prishtinës ka investuar 333 mijë euro në fuqizimin e Brigadës Profesionale të Zjarrfikësve të Kryeqytetit, duke i shtuar flotës një kamion të ri sulmues për intervenime në raste emergjente.
Sipas njoftimit të Komunës, automjeti i ri pritet të rrisë ndjeshëm kapacitetet operacionale të brigadës, duke mundësuar reagim më të shpejtë, më të sigurt dhe më efikas në situata të ndryshme emergjente.
Nga Komuna theksohet se ky investim synon përmirësimin e mbrojtjes së jetës së qytetarëve, pronës dhe mjedisit, si dhe forcimin e gatishmërisë së shërbimeve të emergjencës.
Komuna e Prishtinës ka bërë të ditur se do të vazhdojë investimet në modernizimin e Brigadës Profesionale të Zjarrfikësve dhe në mbështetjen e pjesëtarëve të saj, të cilët çdo ditë janë në vijën e parë të reagimit për sigurinë e qytetarëve./teve1.info/
