Rritja e intensitetit të reshjeve të shiut në vend, si zakonisht rrit edhe rrezikun për vërshime.
Të mërkurën përmes një komunikate për media, edhe vet Instituti Hidrometeorologjik, paralajmëroi një gjë të tillë.
“Gjatë orëve të paradites (e mërkurë 08/11/2023), kanë filluar reshje të shiut në tërë vendin, me intensitet më të lartë nëpër disa zona të cilat mund të shkaktojnë disa vërshime të shpejta, sidomos nga rrjedhat lumore me karakter malorë, të cilat mund të shkaktojnë pengesa në qarkullim”, thuhet nga IHMK.
E njohësi i çështjeve emergjente, Tahir Ahmeti tregon se cilat janë zonat më të rrezikuar nga vërshimet.
Për shkak të reshjeve të mëdha të shiut në muajin qershor të këtij viti komuna e Pejës u përball me vërshime. Përveç dëmeve tek familje e bizneset, nga përmbytjet në këtë qytet dy persona ndërruan jetë.
E dëmet nga kjo fatkeqësi natyrore vlerësohet se kapën shifrën mbi 1 milionë euro, por të njëjtat akoma nuk gjetën kompensimin nga ana e Qeverisë së Kosovës.
Dëme mbi 6 milionë euro nga vërshimet pati edhe komuna e Skenderajt.
Por edhe nga kjo komunë thonë se nuk morën mbështetje financiare nga Qeveria.
Për këtë Asociacioni i Komunave të Kosovës, po kërkon që të formohet një fond emergjent.
Ndërkohë për vërshimet e shtatorit të 2022-ës dhe janarit të këtij viti, së fundmi Qeveria ndau 9 milionë euro për kompensim të dëmeve.
