Pavarësisht reshjeve të borës gjatë natës së kaluar, Komuna e Malishevës ka bërë të ditur se të gjitha rrugët në territorin e saj mbeten të hapura për qarkullim, përfshirë edhe ato në zonat më të thella malore.
Sipas njoftimit për media, komuna ka angazhuar kompanitë përgjegjëse për mirëmbajtjen dimërore të rrugëve, të cilat janë duke punuar intensivisht në pastrimin e borës dhe hedhjen e kripës, me qëllim të garantimit të qarkullimit të lirë dhe të sigurt për qytetarët.
Aktualisht, qarkullimi në të gjitha rrugët e komunës po zhvillohet pa pengesa. Punimet për mirëmbajtjen e rrugëve janë monitoruar nga afër edhe nga kryetari i Komunës së Malishevës, Ekrem Kastrati, i cili ka vizituar disa fshatra në zonën e maleve të Berishës.
Kastrati është shprehur i kënaqur me gjendjen e rrugëve, duke theksuar përkushtimin e kompanive të angazhuara në mirëmbajtjen dimërore. “Komuna ka angazhuar kompanitë përgjegjëse, të cilat po kryejnë punën e tyre me seriozitet. Kam qenë sot në terren për t’u siguruar që qytetarët të kenë qarkullim të sigurt dhe të pandërprerë”, ka deklaruar ai.
Në të njëjtën kohë, Komuna e Malishevës u ka bërë thirrje të gjithë drejtuesve të automjeteve që të jenë të pajisur me pajisje dimërore, sipas kërkesave ligjore, veçanërisht gjatë orëve të mbrëmjes, kur ekziston mundësia e ngricave në rrugë.
