Ky email iu dërgua drejtorëve të shkollave fillore dhe të mesme nga Drejtoria e Arsimit në Komunën e Klinës.
Përmes kësaj shkrese krerët e këtyre institucioneve u njoftuan se punëtorët e sistemit arsimor në këtë komunë nuk mund të marrin pushim pa pagesë.
Krejt kjo sipas drejtorit të arsimit në Klinë, Qemajl Sejdijaj u bë pas kërkesave që erdhën nga mësimdhënësit për pushim 1 vjeçar me heqjen e vizave.
“Drejtoria e Arsimit e ka pasur për qellim për shkak se vit pas viti prej liberalizimit të vizave kemi vazhdueshëm kërkesa prej mësimdhënësve që kërkojnë pushim pa pagesë ka një vit. Kështu që kjo po na shkakton neve probleme deri të humbja e orëve të shumta edhe e kemi parë që trend që po keqpërdorët. Për shembull kur përfundojnë një vjet po kthehen prapë edhe po kemi pengesa të vazhdueshme veç ligji e thotë, ligji i punës neni 40, pika 1 nëse nuk gaboi, që ajo varet direkt nga menaxheri në këtë rast prej drejtorit të drejtorisë së arsimit”, ka deklaruar ai.
Por sipas drejtorit të shkollës fillore të mesme të ulët “Ismet Rraci” në Klinë, Blerim Kelmendi, këtë pushim mund ta shfrytëzoj një kategori e punëtorëve.
“Pushimin pa pagesë për mësimdhënësit që kanë probleme shëndetësore ajo gjithsesi që e ka shfrytëzohet është edhe rasti tek ne, punëtori ndihmës Mentor Gashi e ka shfrytëzuar pushimin pa pagesë njëvjeçar. Kemi pasur dy raste kur kemi pasur bashkim familjar ata e kanë shfrytëzuar këtë pushim, ku ne jemi demtuar deri tek zëvendësimi pasi kuota është e nxënë”.
E mësimdhënësja e kësaj shkolle, Bora Marlekaj e quan të padrejtë mohimin e këtij pushimi në çfarëdo kategorie.
“Për mendimin tim është e padrejtë pasi secili ka nevojat e ndryshme për disa që marrin pushim me pagesë pse mos të jetë edhe kjo pa pagesë ka drejtë që të pushoj që të qetësohet ndoshta nga angazhimet”, ka deklaruar ajo.
Në lidhje me këtë shkresë ka reaguar opozita në Klinë.
Naim Musliu nga Partia Demokratike e Kosovës thotë që kërkesa në fjalë është e kundërligjshme.
“Shkresa e bërë nga DKA e dërguar drejtorëve të shkollave është në kundërshtim me nenin 40 të ligjit të punës pasi neni 40 pika një e sqaron që punëtorët në rast të veçanta kanë të drejtë të pushimin pa pagesë, në shkresën e DKA është potencuar se të gjithë punëtoret në arsim, mësimdhënësit, punëtorët, stafi ndihmës, drejtoret, sekretaret nuk kanë të drejt të marrin pushim pa pagesë prandaj kjo është në kundërshtim me ligjin e punës”, tha ai.
Në komunën e Klinës nga liberalizimi i vizave 12 mësimdhënës kanë kërkuar pushim pa pagesë.
