“Në maj befas na vjen një kompani dhe thotë se ne kemi marrë pëlqim nga ju për trajtim termik të mbeturinave, e po ashtu kemi marre leje ndërtimore në Komunën e Ferizajt dhe në Ferizaj do të ndërtojmë incerinator…”, tha ministri i Mjedisit dhe Planifikimit Hapësinor, Liburn Aliu.
Kjo është arsyeja që sipas Ministrit të Mjedisit dhe Planifikimit Hapësinor, kompanisë për ndërtimin e inceneratorit në Varosh të Ferizajt iu pezullua pëlqimi mjedisor.
Por ndryshe po mendojnë nga Komuna e Ferizajt, që sipas tyre projekti në fjalë është planifikuar të ndërtohet larg nga shtëpitë e banuara.
“Matjet i kanë bërë arkitektët që e kanë trajtuar lëndën, po unë e thashë edhe më herët që kriteret që janë të përcaktuara me ligj të ndërtimit, qe 50 metra e kemi një fabrikë e cila merret me natyrën e njëjtë, të përafërt të punës për fabrikën që e kemi lëshu tani. Dhe aty në pjesën ku po flasim, nuk ka shtëpi përreth”, tha drejtor i Urbanizmit në Komunën e Ferizajt, Arbër Bytyçi.
Një dëshmi tjetër sipas autoriteteve komunale është se në vendin ku planifikohej të ndërtohej ky incenerator është funksionale një fabrikë tjetër për riciklimin e mbeturinave.
Por si është pajisur investitori me leje ndërtimore?
“Ligji është shumë i qartë, procedurat ligjore janë shumë specifike në ligjin e ndërtimit për këtë kategori dhe ne jemi bazuar në këto ligje dhe është pajisur me leje ndërtimore investitori në fjalë”, tha Bytyçi.
E ky veprim i Qeverisë, sipas Komunës, është i papranueshëm. Andaj kërkojnë që të mos ketë ndërhyrje nga niveli qendror.
“Për neve është shumë shqetësuese qasja e qeverisë se si trajtohet një investim thashë rreth 150 milionë euro, ish dashtë normalisht të trajtohet më ndryshe pasi që i kemi model vendet përreth të cilat i presin me duarhapur të gjitha këto investime dhe investitorë ndërsa ne i kemi këtu dhe me njëfarë forme me veprimet apo mosveprimet tona po i largojmë”, shtoi ai.
Tëvë1 ka kërkuar nga Prokuroria Themelore përgjigje se a është duke e shqyrtuar rastin në fjalë, mirëpo të njëjtët nuk i janë përgjigjur interesimit të televizionit.
