Volvo Cars njoftoi të hënën se do të eliminojë rreth 3,000 vende pune në një përpjekje për të reduktuar kostot në mesin e sfidave të shumta që po përjeton industria globale e automobilave, përfshirë tensionet tregtare dhe pasiguritë ekonomike.
Sipas deklaratës së kompanisë, rreth 1,200 prej këtyre vendeve do të prekin punonjës në Suedi, ndërsa 1,000 pozicione të tjera të mbuluara aktualisht nga konsulentë, gjithashtu kryesisht në Suedi, janë të planifikuara për t’u hequr.
Pjesa tjetër e shkurtimeve do të ndikojë në tregje të tjera ndërkombëtare. Shumica e vendeve të punës që do të preken janë pozicione administrative dhe në zyra, ka shkruar AP.
“Vendimet e bëra sot kanë qenë të vështira, por të domosdoshme për të ndërtuar një Volvo Cars më të fortë dhe më të qëndrueshëm,” tha Hakan Samuelsson, president dhe CEO i kompanisë.
“Industria e automobilave po kalon një periudhë të vështirë, dhe për ta përballuar atë, duhet të përmirësojmë gjenerimin e fluksit të parasë dhe të ulim në mënyrë strukturore kostot.”
Volvo Cars, e cila ndodhet në pronësi të kompanisë kineze Geely, ka aktualisht rreth 42,600 punonjës me kohë të plotë në mbarë botën. Selia kryesore dhe qendrat e zhvillimit të produkteve ndodhen në Göteborg, Suedi, ndërsa prodhimi realizohet në Belgjikë, Karolinën e Jugut të SHBA-së dhe në Kinë.
Ky vendim vjen në një kohë kur prodhuesit globalë të automjeteve përballen me një sërë sfidash, përfshirë rritjen e kostove të lëndëve të para, tkurrjen e tregut evropian të makinave dhe ndikimin e tarifave 25% për importet e automjeteve dhe çelikut të vendosura nga Presidenti i SHBA-së, Donald Trump.
