Kosova është njohur zyrtarisht nga kompania amerikane “Amazon” dhe është përfshirë në të gjitha platformat e saj.
Kështu është bërë e ditur nga Presidenca e Kosovës ku thuhet se kjo ka ndodhur me angazhimin e presidentes Vjosa Osmani.
“Me përfshirjen në të gjitha platformat e Amazon-it, Republika e Kosovës shënon një moment të rëndësishëm në zhvillimin dhe transformimin digjital të vendit. Kjo arritje vjen si rezultat i takimeve të nivelit të lartë të mbajtura në tetor të këtij viti, ndërmjet Presidentes së Republikës së Kosovës, Vjosa Osmani dhe përfaqësuesve të kompanisë Amazon në Ëashington D.C., SHBA. Këto diskutime janë gjithashtu pjesë e përpjekjeve të vazhdueshme të ndërmarra nga Task Forca për Diplomacinë Digjitale, një iniciativë e Odës Ekonomike Amerikane në Kosovë, e mbështetur nga Ambasada e SHBA-ve në Prishtinë”, thuhet në komunikatë.
Më tej thuhet se prania në platformat Amazon, u mundëson individëve dhe bizneseve kosovare ta zgjerojnë shtrirjen e tyre dhe t’i prezantojnë produktet vendore para një audience globale në amazon.com, duke nxitur sic thuhet rritjen ekonomike dhe inovacionin.
“Ky zhvillim gjithashtu lehtëson qasjen për konsumatorët, të cilët mund të lidhen pa pengesa me një nga platformat më të mëdha të tregtisë elektronike në botë, si dhe përdorimin e shërbimeve si: Amazon Web Services (AËS), Amazon Alexa, etj.”, bëhet e ditur tutje.
Po ashtu bëhet e ditur se presidentja Osmani në bashkëpunim me Odën Ekonomike Amerikane, janë duke zhvilluar takime të vazhdueshme edhe me platforma të tjera të rëndësishme digjitale./teve1.info/
