Përmes njoftimit, ME bëri të ditur se takimi i dytë është mbajtur për masa të reja për lehtësimin me furnizim me energji elektrike në Kosovë.
“Duke u bazuar në situatën energjetike në Kosovë, Komiteti Teknik Emergjent (KTE), i themeluar nga Ministrja Artane Rizvanolli, që përbëhet nga përfaqësues të të gjithë institucioneve relevante të energjisë mbajti takimin e dytë. Takimi i dytë për ditën e sotme menjëherë pas themelimit, u organizua në orën 21:00, për të rekomanduar masa të reja për lehtësimin me furnizim me energji elektrike në Kosovë”, thuhet ndër tjerash në njoftim.
Sipas ME-së, Komiteti ka rekomanduar që Korporata Energjetike e Kosovës të sigurojë energjinë e nevojshme për të evituar reduktimet për konsumatorët.
“Me qëllim të tejkalimit të situatës me furnizim të energjisë elektrike që do të zgjas deri më 25 gusht 2022, Komiteti Teknik Emergjent rekomandoi që KEK të sigurojë energjinë e nevojshme për të evituar reduktimet për konsumatorët dhe devijimet në rrjetin energjetik. Ministria e Ekonomisë inkurajon të gjithë qytetarët të kursejnë energjinë, veçanërisht këto ditë deri sa blloku i dytë i Termocentralit “Kosova B” të hyjë në funksion pas remontit përgatitor për sezonin e dimrit”, njofton ndër tjerash ME./teve1.info/
