Ministrja e Ekonomisë, Artane Rizvanolli gjatë raportimit në komision, ka thënë se në kuadër të masave emergjente, janë marrë disa vendime, mes tyre është shfuqizuar vendimi i vitit 2018, ku ka ndaluar dhënien e thëngjillit si formë dhurate për punëtorët e KEK-ut.
Rizvanolli para deputetëve ka demantuar raportimet në media lidhur me remontin gabimisht të njësisë “B2”. Ministrja Rizvanolli i ka quajtur shpifje këto raportime se është bërë gabimisht riparimi i këtij blloku në KEK. Ndonëse, Rizvanolli ka kërkuar kursim të energjisë nga qytetarët, ka paralajmëruar se pritet një krizë e thellë për furnizim me energji elektrike gjatë dimrit.
Pas insistimit të kryetarit të Komisionit, Ferat Shala, ministrja e Ekonomisë ka pranuar se mjetet financiare milionëshe për subvencionim të energjisë janë alokuar në xhirollogaritë e KESCO-s.
Sa i përket furnizimit me energji në minierën e Trepçës dhe rënies së performancës së kësaj ndërmarrje publike, kjo ngjalli debat të ashpër mes deputetit Armend Muja dhe kryetarit të Komisionit, Ferat Shala.
Pikërisht për këtë, Muja akuzoi deputetin Shala për operimin me humbje të Trepçës nga viti 2016. Për këtë reagoi deputeti Shala, të cilin e quajti të pa ditur, deputetin Muja.
Deputetja Mimoza Kusari Lila ka apeluar që në këtë betejë me krizën energjetike, të mos ketë shaka ose dezinformata në opinion, për kursime dhe punën në KEK.
Deputeti Pal Lekaj theksoi se masat qeveritare për krizën energjetike janë të pamjaftueshme.
“Masa mbështetëse për qytetarët me qëllim të sigurimit të ngrohjes gjatë dimrit; Ndalimin e përdorimit të energjisë elektrike për mihjen e kriptovalutave; Mbështetjen e Operatorit të Sistemit të Transmisionit dhe Tregut (KOSTT) për të ndërmarrë veprimet e nevojshme në funksion të ruajtjes së sigurisë së sistemit elektro-energjetik; dhe Masa në kursimin e konsumit të energjisë elektrike nga të gjitha institucionet”, kujtojmë se këto janë masat që janë ndërmarrë nga Qeveria.
