Komisioni Evropian ka propozuar një paketë sanksionesh të pjesshme ndaj Izraelit, si përgjigje ndaj pwrshkallwzimit tw dhunws izraelite në Rripin e Gazës.
Sipas të dhënave të vitit 2024, tregtia midis Izraelit dhe Bashkimit Evropian arriti vlerën e 42.6 miliardë eurove (rreth 50.45 miliardë dollarë), ku 37 përqind e kësaj tregtie mbulohet nga një marrëveshje preferenciale tregtare ndërmjet palëve.
Komisioneri i Tregtisë së BE-së, Maroš Šefčovič, deklaroi se Bashkimi Evropian e ka ndërmarrë këtë hap me keqardhje, por e konsideron atë “të përshtatshëm dhe proporcional në kushtet e një krize humanitare që po përkeqësohet vazhdimisht.”
“Në dritën e këtyre shifrave dhe parimeve që janë në lojë, pezullimi i pjesshëm i propozuar është një përgjigje e menduar me kujdes ndaj një situate gjithnjë e më urgjente,” shtoi ai.
Megjithatë, propozimi nuk është ende përfundimtar. Ai duhet të miratohet përmes votimit nga shtetet anëtare të BE-së.
Blloku është i ndarë në qëndrimet e tij: Gjermania, Hungaria dhe Republika Çeke janë kundër masave të ashpra ndaj Izraelit, ndërsa vende si Spanja dhe Irlanda po i shtyjnë institucionet evropiane drejt një qëndrimi më të ashpër dhe sanksioneve më të fuqishme.
