Komisioni Evropian miratoi të hënën 6.1 miliardë euro ndihmë të re mbrojtëse për Ukrainën, përfshirë sisteme të mbrojtjes ajrore dhe raketore, raketa, municione dhe radarë.
“Në Ditën e Pavarësisë së Ukrainës, Evropa tregon se mbështetja jonë është e palëkundur dhe konkrete”, tha Presidentja e Komisionit Evropian, Ursula von der Leyen.
“Sot, kemi miratuar 6.1 miliardë euro për sistemet e mbrojtjes ajrore dhe raketore, raketat, municionet dhe radarët që i nevojiten urgjentisht Ukrainës”, shtoi ajo.
Financimi është pjesë e Kredisë Mbështetëse për Ukrainën prej 90 miliardë eurosh për vitet 2026-2027, e cila përfshin 60 miliardë euro për mbrojtjen dhe 30 miliardë euro për mbështetje buxhetore.
Komisioni tha se rritja e përdorimit të raketave balistike dhe dronëve nga Rusia e bën urgjente forcimin e mbrojtjes ajrore të Ukrainës. Shumica e prokurimeve do të sigurohen nga kompanitë evropiane të mbrojtjes.
Me miratimin e fundit, fondet për planet e prokurimit të mbrojtjes arrijnë në 16 miliardë euro, nga të cilat 8.35 miliardë euro janë disbursuar.
BE-ja dhe shtetet anëtare kanë siguruar gjithsej 220.2 miliardë euro mbështetje për Ukrainën që nga viti 2022.
