Komandanti i Stacionit Policor në Lipjan, Argjend Gashi, ka konfirmuar për Tëvë1 se ka dorëzuar dorëheqjen e tij nga kjo pozitë, në shenjë përgjegjësie morale pas zhvillimeve të fundit në këtë komunë.
““Kam dhënë dorëheqje në mënyrë morale. E kam dorëzuar sot te Drejtori i Përgjithshëm i Policisë së Kosovës, por ende nuk është konfirmuar. Kjo nuk lidhet vetëm me rastin në Lipjan, por edhe me arrestimin e zyrtarëve policorë. Pres që dorëheqja ime morale të aprovohet nga drejtori i përgjithshëm”, ka deklaruar Gashi.
Ai ka sqaruar se vendimi i tij nuk ka të bëjë vetëm me rastin e fundit në Lipjan, ku një qytetar humbi jetën gjatë një ndërhyrjeje policore, por edhe me arrestimin e pesë zyrtarëve policorë të dyshuar për përfshirje në këtë ngjarje.
Drejtori i Përgjithshëm i Policisë së Kosovës, Gazmend Hoxha, ka konfirmuar për Tëvë1 se ka aprovuar kërkesën për dorëheqje të komandantit të stacionit policor në Lipjan, Argjend Gashi. Ky i fundit kishte bërë kërkesë për lirim nga detyra në mënyrë morale, pas zhvillimeve të fundit të lidhura me rastin e vdekjes së 27-vjeçarit Agon Zejnullahu dhe arrestimin e pesë zyrtarëve policorë.
Sipas burimeve të Tëvë1 të cilat kanë bërë me dije në vend të tij do të emërohet kapiteni Brahim Shatrolli, i cili aktualisht është komandant i Njësisë së Trafikut në Ferizaj.
Komandanti i Policisë në Lipjan, jep dorëheqje morale pas rastit tragjik të 27-vjeçarit
