Komandanti i Komandës Rajonale Lindje (RC-E) të KFOR-it, kolonel Sam Sargeant, ka zhvilluar një takim me kryetarin e Komunës së Zveçanit, Dragiša Milović, në ambientet e komunës.
Sipas njoftimit të KFOR-it, takimi u mbajt në kuadër të angazhimit të rregullt të misionit me udhëheqësit vendorë, me fokus diskutimin e situatës së sigurisë dhe çështjeve që prekin komunën.
Gjatë takimit, kolonel Sargeant theksoi përkushtimin e KFOR-it për të bashkëpunuar ngushtë me institucionet lokale, me synim forcimin e bashkëpunimit dhe kontributin në krijimin e një mjedisi të sigurt për të gjithë qytetarët e Kosovës, në mënyrë të paanshme dhe transparente.
“KFOR-i vazhdon të zbatojë mandatin e tij, bazuar në Rezolutën 1244 të Këshillit të Sigurimit të OKB-së të vitit 1999, për të kontribuar në një mjedis të sigurt për të gjithë njerëzit që jetojnë në Kosovë dhe për të garantuar lirinë e lëvizjes, në çdo kohë dhe në mënyrë të paanshme”, thuhet në njoftimin e KFOR-it.
