Komandanti i njësitit special të Policisë Ushtarake të Serbisë, që njihet si “Kobra”, Darko Gjoshiq, ka thënë se pjesëtarët e njësitit të tij nuk janë futur në territorin e Kosovës.
Komandanti serb i është përgjigjur akuzave të kryeministrit të Kosovës, Albin Kurti, i cili ka thënë se pjesëtarët e njësitit “Kobra” dhe ata të njësitit special të Policisë së Serbisë, janë futur në territorin e Kosovës javën e kaluar dhe kanë rrëmbyer tre policë kosovarë në Leposaviq.
“Njësiti ‘Kobra’ i Ushtrisë së Serbisë nuk ka qenë i angazhuar në rajonin e Kosovës e M. dhe kur me urdhër të kryekomandantit Aleksandar Vuçiq angazhohemi dhe kur e marrim atë urdhër, atëherë do ta zbatojmë plotësisht”, ka thënë Gjoshiq për “Tanjug”.
Më 14 qershor zyrtarët kosovarë thanë që tre zyrtarë policorë janë kidnapuar brenda thellësisë së territorit të Kosovës, derisa shteti serb këtë rast e cilëson arrestim.
Ndërkohë, policëve kosovarë iu është caktuar masa e paraburgimit prej 30 ditëve.
Lidhur me këtë ngjarje kanë reaguar autoritetet ndërkombëtare, duke përfshirë shtetet e QUINT-it, të cilat kanë bërë thirrje për lirimin e policëve kosovare.
Gjithashtu, përfaqësuesi i Lartë i BE-së për politikë të jashtme Josep Borrell, ka paralajmëruar takim me Kurtit dhe presidentit të Serbisë, Aleksander Vuçiq, ku ky i fundit tha që nuk do të merr pjesë./teve1.info/
