Komandanti i Forcës së Sigurisë së Kosovës (FSK), gjenerallejtënant Bashkim Jashari, ka pritur në takim senatoren e Shteteve të Bashkuara të Amerikës për shtetin e Ajovës, Joni K. Ernst.
Gjatë takimit u diskutua për zhvillimet aktuale dhe perspektivën e FSK-së, prioritetet e saj, si dhe rëndësinë e vazhdimit të bashkëpunimit të ngushtë me Shtetet e Bashkuara të Amerikës.
Sipas njoftimit, në fokus të bisedimeve ishin edhe zhvillimet aktuale të sigurisë dhe sfidat e përbashkëta, me theks të veçantë në forcimin e partneritetit ndërmjet Kosovës dhe SHBA-së në fushën e mbrojtjes dhe sigurisë.
Jashari ka shprehur mirënjohjen e tij për vizitën e senatores Ernst dhe për mbështetjen e vazhdueshme amerikane ndaj Republikës së Kosovës dhe FSK-së.
Ai ka theksuar rëndësinë e thellimit të mëtejshëm të partneritetit dhe marrëdhënieve bilaterale, veçanërisht në fushën e mbrojtjes dhe sigurisë.
Ernst ishte e shoqëruar nga e ngarkuara me punë në Ambasadën Amerikane, Anu Prattipati, si dhe nga adjutanti i përgjithshëm i Ajovës, gjeneralmajor Stephen Osborn./teve1.info/
