Komandanti i Forcës së Sigurisë së Kosovës, Gjenerallejtënant Bashkim Jashari, po qëndron për një vizitë zyrtare në shtetin e Iowa të Shteteve të Bashkuara të Amerikës, me ftesë të Agjutantit të Përgjithshëm të Gardës Kombëtare të Iowa, Gjeneral Major Stephen Osborn.
Gjatë kësaj vizite, Jashari ka marrë pjesë në adresimin vjetor të Guvernatores së Iowa-s, Kim Reynolds, para Asamblesë së Përgjithshme të këtij shteti.
“Me këtë rast u vlerësua lart bashkëpunimi ndërmjet dy shteteve si një histori suksesi dhe u theksua rëndësia e thellimit të bashkëpunimit edhe në të ardhmen”, thuhet në njoftimin e Forcës së Sigurisë së Kosovës.
Sipas FSK-së, vizita e Gjenerallejtënant Jasharit në SHBA dëshmon marrëdhëniet e shkëlqyera ndërmjet Kosovës dhe Shteteve të Bashkuara, si dhe bashkëpunimin e ngushtë ndërmjet forcave të armatosura të dy vendeve.
Po ashtu, gjatë takimeve me Gjeneral Major Stephen Osborn, janë diskutuar çështje që lidhen me Programin e Partneritetit Shtetëror (State Partnership Program), sfidat e sigurisë dhe aktivitetet e përbashkëta mes FSK-së dhe Gardës Kombëtare të Iowa-s.
FSK ka theksuar se ky bashkëpunim vazhdon të jetë i një rëndësie të veçantë për zhvillimin profesional dhe operacional të forcave të saj.
