Të hënën, mbi 900 kolonë izraelitë, përfshirë disa deputetë të Knessetit, hynë në kompleksin e Xhamisë Al-Aksa në Jerusalemin Lindor të pushtuar, për të shënuar përvjetorin e marrjes së qytetit nga Izraeli, raportuan mediat palestineze.
Sipas raportimit të agjencisë palestineze të lajmeve Wafa, kolonët zhvilluan rituale fetare në oborret e xhamisë dhe disa prej tyre tentuan të fusnin rrotulla të Torës përmes Portës Al-Mugharbah, e cila gjendet në anën perëndimore të kompleksit, ka shkruar Anadoly.
Në pjesën lindore të oborrit, u panë flamuj izraelitë të valëvitur, ndërsa grupe kolonësh kryen kërcime dhe veprime të konsideruara provokuese. Ndërkohë, forcat izraelite ngritën barriera metalike në zonën e Portës së Damaskut dhe në Qytetin e Vjetër, duke kufizuar hyrjen për palestinezët, raportoi më tej Wafa.
Kolonët kanë kërkuar një rritje të pranisë së tyre në zonë dhe kanë paralajmëruar një “marshim me flamuj” nëpër lagje palestineze gjatë së njëjtës ditë, duke rritur tensionet në qytet.
Që nga viti 2003, Izraeli ka lejuar kolonët hebrenj të vizitojnë kompleksin pothuajse çdo ditë, përveç të premteve dhe të shtunave.
Xhamia Al-Aksa, e konsideruar një nga tre vendet më të shenjta për myslimanët, ndodhet në një zonë që hebrenjtë e njohin si “Mali i Tempullit”, ku sipas besimit hebraik dikur ndodheshin dy tempujt antikë.
Izraeli mori kontrollin e Jerusalemit Lindor gjatë luftës së vitit 1967 dhe e aneksoi zyrtarisht në vitin 1980 – një veprim që nuk është njohur nga shumica e bashkësisë ndërkombëtare.
