Shkaku i kolonave të gjata në rrugën Mitrovicë – Prishtinë, Policia e Kosovës ka shtuar masa shtesë për sigurinë në trafikun rrugor.
Përmes një komunikate për media policia thotë se me qëllim të rrjedhjes normale të trafikut, prezenca policore përpos njësive të trafikut do të ketë njësi shtesë të angazhuara, të cilat do të jenë të pranishme në udhëkryqe, rreth-rrotullime si dhe segmente të caktuara rrugore për kontrolle dhe ofrimin e sigurisë në trafik.
“Në kuadër të këtyre angazhimeve të shtuara njësitë policore po ndërmarrin veprimet e parapara ligjore duke mos përjashtuar gjobat ndaj kundërvajtësve të cilët nuk iu përmbahen rregullave dhe rrezikojnë pjesëmarrësit në trafik”, thuhet në njoftim.
Tutje, është bërë e ditur se gjatë 24-orëve të fundit janë shqiptuar 147 gjoba të ndryshme, përfshirë kundërvajtje pa patentë shofer, pa regjistrim te automjetit, ngasje nën ndikim alkooli, përdorim i telefonit gjatë ngasjes etj./teve1.info/
