Ka përfunduar seanca e procedurës paraprake ndaj Bojan Jevtiqit, Shefit të Operativës në pikën kufitare “Dheu i Bardhë”.
Prokuroria Speciale e Kosovës ka paraqitur sot kërkesë për caktimin e masës së paraburgimit ndaj Bojan Jevtiq, i dyshuar për veprën penale të spiunazhit.
Prokurori i çështjes, Bekim Kodraliu, deklaroi se gjatë një aksioni të gjerë të zhvilluar dje nga Prokuroria Speciale në shtëpinë e të dyshuarit dhe në objekte përcjellëse, janë siguruar prova materiale të mjaftueshme që e lidhin Jevtiqin me aktivitetet e dyshuara penale.
“Provat e siguruara kanë fuqizuar dyshimin tonë se i pandehuri ka qenë i përfshirë në veprime që cenojnë rendin kushtetues të Republikës së Kosovës, zyrtarët dhe institucionet e saj”, u shpreh prokurori Kodraliu.
Gjatë kontrollit, sipas tij, janë gjetur dhe sekuestruar:
- Një armë e shkurtër pa leje
- Municion
- Një shumë e madhe parash
- Monedha dhe dokumente konfidenciale që lidhen me sigurinë juridike dhe institucionale të Kosovës
Sipas prokurorit Kodraliu, Jevtiqi nuk ka arritur të justifikojë burimin e të hollave të gjetura, për të cilat dyshohet se janë përfituar përmes veprimeve penale të lidhura me spiunazh.
“Duke marrë parasysh rrezikun që i paraqet rendit dhe sigurisë kushtetuese të vendit, kemi paraqitur kërkesë për paraburgim ndaj tij”, theksoi Kodraliu.
Vlerësimi i kërkesës për paraburgim pritet të bëhet nga Gjykata në vazhdim të ditës.
