Është vetëm njëri nga shumë banorët e Kodrës së Trimave që i është gëzuar ndërtimit të këndit të lodrave në këtë zonë.
Ramadan Ahmeti, thotë se nuk mbanë mend që ka pasur parqe të tilla në të kaluarën këtu.
“Nuk ka pasur parqe të tilla, edhe jemi të kënaqur por kjo lagje gjithmonë është mbetur e mbra pambetur. Parku është i mirëseardhur për fëmijët sidomos me dal me pushu mos me qëndrua në pluhur e në mbeturina por me dal me pushu e me marr pak ajër e me u argëtua me shokë të vetë. Jo vetëm ky park por është deshtë shumë parqe me qenë për fëmijë. Se për fëmijë po jetojmë”, tha Ahmeti.
Përveç fëmijëve këtë hapësirë do ta shfrytëzojnë edhe pensionistët.
“Prej të ‘99 e këndej park për fëmijë nuk ka pasur, as për lodra nuk ka pasur, por qe tash e kanë parë të arsyeshme me nderua e mirë është ajo. Ajo është një plus se po tregojnë që janë tu punuar diçka për të mirën e popullit. Është mirë se grumbullohen të moshuarit shkojnë aty e kalojnë kohën aty”, tha pensionisti Nuhi Namani.
Si ide e mirë po i duket edhe Nazmi Nezirit, veçse ai ka një propozim.
“Është plan i mirë, ide e mirë por propozimi im ishte që nëse mundet Komuna në marrëveshje me rregulloret me lënë aty një person për mirëmbajtje për mbylljen e hapjen e jo me lënë 24 orë hapë se para 10 dite ke rasti që e kanë dëmtuar”, tha ai.
Kurse opozita në kryeqytet thonë se qysh kaherë kanë kërkuar ndërtimin e një këndi të tillë të lojërave dhe jo vetëm.
“Para dy viteve unë kam propozuar aty një park por edhe një parking nëntokësorë, për shkak se lagjja jonë ka mungesë të parkingjeve dhe të parqeve, e unë kam thanë që mundet me u shfrytëzua një parking nëntokësor dhe një park. Por, Komuna e Prishtinës këtë nuk e ka marrë parasysh,është duke e bërë një jo park por mund të themi një kënd të lojërave sa për sy e faqe një farë mënyre tash në fund të mandatit për shkak se si thotë populli një gozhdë nuk e ka vendos në lagjen Kodra e Trimave dhe me këtë po duan të mbulojnë diçka por nuk mendoj që është e mjaftueshme. Normal që na e presim çdo investim të mirë por nuk mendojmë që është e mjaftueshme”, tha Besart Krasniqi, asamblist nga LVV-ja.
Si të nevojshëm ndërtimin e një këndi të tillë e kanë parë edhe nga Komuna e Prishtinës.
“Është duke u bërë ndërtimi i një hapësirë për rekreacion dhe sport. Ajo hapësirë do të përfshihet për të gjitha moshat, të gjitha kategoritë të kenë qasje të kenë edhe çfarë të bëjnë aty. Do të ketë kënd të lodrave pra që i përfshin fëmijët të moshave të hershme deri në 12 vjet. Po ashtu ka edhe fusha sportive. Është vend ku Kodrës së Trimave i ka munguar, andaj e kemi parë të arsyeshme që të bëjmë këtë investim aty”, tha drejtori i Sportit në Komunën e Prishtinës, Kushtrim Mushica.
Tutje Mushica tregoi se punimet pritet të përfundojnë brenda muajit.
“Duke parë zhvillimet se si po shkojnë, domethënë me tempon me ritmin e punës që po behët brenda muajit edhe do të përfundojë. Kjo është në plan por shpresoj të mos dal diçka rrugës sikur edhe që ka ndodhur meqë veç jemi tek ky lokacion”, tha ai.
Javën e kaluar një pjesë e këtij parku u përfshi nga zjarri me ç’rast u dëmtua një pjesë e investimit por jo i gjithi.
