Nesër më 17 prill do të vazhdojë gjykimi për sulmin terrorist në Banjskë, ku u vra rreshteri i Policisë së Kosovës, heroi Afrim Bunjaku.
Lajmin e ka bërë të ditur përmes një postimi në Facebook avokati i familjes së Afrim Bunjakut, Arianit Koci.
“Nesër vazhdon gjykimi për sulmin terrorist në Banjskë, ku u vra rreshteri i Policisë së Kosovës, heroi Afrim Bunjaku. Unë jam avokati i familjes së tij. Më 24 shtator 2023, një grup i armatosur, i trajnuar dhe i dirigjuar, kreu një ndër sulmet më të rënda kundër rendit kushtetues të Kosovës. Qëllimi ishte i qartë: ndarja territoriale e veriut dhe sfidimi i sovranitetit të shtetit tonë. Afrim Bunjaku ra në detyrë, duke mbrojtur territorin e Republikës së Kosovës”, ka shkruar ai.
Ai ka thënë se ky proces gjyqësor më shumë se drejtësi individuale është mbrojtje e rendit kushtetues dhe sipas tij gjykimi duhet të jetë efikas, pa zvarritje dhe pa amnisti të heshtur.
Koci ka shtuar se drejtësia për Afrim Bunjakun është detyrim i Kosovës pasi ai ka rënë për të.
“Nuk jemi përballë një rasti të zakonshëm penal, por përballë një akti kriminal me prapavijë politike dhe struktura terroriste të organizuara pas tij. Ky proces gjyqësor është më shumë se drejtësi individuale është mbrojtje e rendit kushtetues. Të gjitha të drejtat që u takojnë të akuzuarve do të garantohen. Jemi shtet serioz. Por gjykimi duhet të jetë efikas. Pa zvarritje.Pa amnisti të heshtur. Drejtësia për Afrim Bunjakun është detyrim i Republikës së Kosovës. Sepse ai ka rënë për të”, ka shkruar tutje Koci.
