Arianit Koci, avokat i kryeinspektorit të Punës, Hekuran Nikçi, i cili sot është ndaluar për 48 orë, ka thënë se ndalesa është e pabazuar.
Në një deklarim për media të publikuar në Facbook, ai ka thënë se Nikçi po hetohet pa prova konkrete.
“Nikçi po hetohet pa prova konkrete për përgjegjësinë e tij penale, ndërsa mënyra se si po zhvillohet ky proces nuk i ngjan një hetimi të drejtë dhe ligjor. Për më tepër, kjo është çështje e interpretimit juridik të veprimeve ligjore të palëve në një kontest administrativ. Drejtësia duhet të mbetet e pavarur dhe e paanshme, pa u ndikuar nga faktorë politikë apo interesa të tjera”, ka shkruar Koci.
Prokuroria Themelore në Prishtinë ka njoftuar se ka ndaluar për 48 orë kryeinspektorin e Punës, Hekuran Nikçin, dhe U.D Menaxherin e Njësisë për Menaxhimin e Burimeve Njerëzore në Inspektoratin Qendror të Punës, Naim Shalaku.
Nikçi dyshohet se kryer veprat penale ‘keqpërdorimi i pozitës apo autoritetit zyrtar, cenimi i të drejtave nga marrëdhënia e punës dhe përdorimi i paautorizuar të pasurisë’.
Kryeinspektori i Punës ndalohet për 48 orë, dyshohet për keqpërdorim të pozitës zyrtare
