Njohësi i çështjeve politike, Melazim Koci, ka vlerësuar se kryeministri në detyrë, Albin Kurti, nuk e ka dëshiruar formimin e qeverisë që pas përfundimit të zgjedhjeve parlamentare më 9 shkurt.
Sipas Kocit, dëshira e Kurtit ka qenë dhe vazhdon të jetë formimi i qeverisë me pakicat joserbe, ose në të kundërtën të shkojë në opozitë.
“Unë mendoj që Kurti as që e ka dëshiruar formimin e qeverisë nga përfundimi i zgjedhjeve para 7-8 muajve. Në fakt, ai e ka dëshiruar formimin e qeverisë, por e ka dëshiruar i vetëm, pra ai vetëm bashkë me pakicat joserbe, ose në të kundërtën të shkojë në opozitë. Unë mendoj se ky ka qenë qëndrimi i Kurtit, ky është edhe tani qëndrimi i tij, dhe mendoj që edhe në zgjedhjet e ardhshme ky do të jetë qëndrimi i Kurtit, pavarësisht a e thotë ai apo jo. Do të thotë, Kurti dëshiron të qeverisë i vetëm me pakicat joserbe ose të shkojë në opozitë. Mendoj që është një qëndrim legjitim, është e drejtë e tij”, ka thënë ai në emisionin “Ditari” në Tëvë1.
Ai ka shtuar se edhe opozita aktualisht nuk ka shumicën apo vullnetin për të formuar qeverinë e re.
“As opozita në këtë moment nuk e ka shumicën dhe nuk e ka as vullnetin për ta bërë qeverinë, sepse shtrohet pyetja: Çfarë i duhet opozitës një qeveri e cila do të funksionojë vetëm 3-4 muaj?”, ka theksuar Koci.
Ndërkohë, për zgjidhjen e krizës politike, Koci ka deklaruar se nuk sheh alternativë tjetër përveç mbajtjes së zgjedhjeve, por jo në periudhën e afërt.
“Normalisht që nuk shoh zgjidhje tjetër përveç zgjedhjeve, por jo siç po pohojnë shumica, zgjedhjet tani para apo pas vitit të ri, sepse mendoj që do të jetë gabim nëse zgjedhjet mbahen tani, pasi gjasat janë shumë të mëdha që nëse zgjedhjet mbahen këtë kohë, raporti i forcave të mbetet i njëjtë dhe ne prapë të kemi bllokadë të sërishme”, ka përfunduar Koci.
Ndryshe, më 11 tetor presidentja Osmani, në mbështetje të kompetencave të saj kushtetuese, nënshkroi Dekretin, me të cilin mandatoi kreun e Lëvizjes Vetëvendosje, Albin Kurtin, për formimin e Qeverisë së Republikës së Kosovës.
Ky vendim është marrë pas propozimit zyrtar të partisë Lëvizja Vetëvendosje, e cila me 48 mandate ka fituar numrin më të madh të ulëseve në Kuvend nga rezultatet e zgjedhjeve të mbajtura me 9 shkurt të këtij viti.
Sipas Kushtetutës, mandatari për formimin e Qeverisë, Kurti, është i obliguar që jo më vonë se 15 ditë nga dita e dekretimit, apo deri më 26 tetor më së largu, t’i paraqesë Kuvendit të Republikës së Kosovës përbërjen dhe programin e Qeverisë për miratim.
Megjithatë, nga ajo që shihet në publik dhe deklaratat e subjekteve politike, një koalicion qeveritar duket pothuajse i pamundur, për shkak se Vetëvendosje ka vetëm 48 deputetë dhe bashkë me pakicat joserbe nuk arrin numrin prej 61 votash të nevojshme, ndërkohë që një bashkëpunim me partitë tjera nuk duket në horizont./teve1.info/
