Koalicioni për Lirinë e Medias, një grup prej më shumë se 50 vendesh të bashkuara për të mbrojtur lirinë e shtypit dhe sigurinë e gazetarëve, ka lëshuar një deklaratë mbi situatën në Gaza.
Deklarata i bën thirrje Izraelit “të lejojë menjëherë aksesin e mediave të huaja të pavarura dhe të sigurojë mbrojtje për gazetarët që veprojnë në Gaza”.
“Gazetarët dhe punonjësit e medias luajnë një rol thelbësor në vënien në qendër të vëmendjes të realitetit shkatërrues të luftës”, thuhet në deklaratë, të nënshkruar nga shumë anëtarë partnerë, përfshirë Australinë, Austrinë, Gjermaninë, Irlandën, Norvegjinë, Holandën dhe Mbretërinë e Bashkuar.
“Qasja në zonat e konfliktit është jetike për të kryer këtë rol në mënyrë efektive.”
Në të thuhej se nënshkruesit gjithashtu “dënojnë fuqimisht çdo dhunë të drejtuar kundër gazetarëve dhe punonjësve të medias, veçanërisht numrin jashtëzakonisht të lartë të viktimave, arrestimeve dhe ndalimeve”, raporton Al Jazeera.
Që prej fillimit të luftës në Gaza, Izraeli ua ka ndaluar gazetarëve të huaj hyrjen në Rrip, përveç rasteve kur shoqërohen nga ushtria.
