Rezultatet përfundimtare të zgjedhjeve ende nuk janë certifikuar.
Megjithatë, diskutimet politike tashmë janë përqendruar te krijimi i institucioneve të reja.
Një ditë më parë, kreu i Lëvizjes Vetëvendosje, që deri tani ka siguruar 50 ulëse në Kuvend, deklaroi se do të komunikojë me partitë e tjera për çështjen e presidentit.
Por sipas politologut Avdi Smajljaj, nëse bashkëpunimi bëhet vetëm për president, kjo do ta zvogëlonte mundësinë për negocim.
“Kjo është një shenjë, do të thoja, jo shumë e frytshme në rast se presim krijimin e institucioneve, sepse sikur të ishte bashkëpunimi edhe për qeverinë, edhe për presidentin, atëherë mundësitë do të ishin shumë më të mëdha që të kemi një zgjidhje dhe vendi mos të shkojë në zgjedhje prapë. Por në rast se bashkëpunimi kërkohet vetëm për president, kjo sikur i ul nevojën e partive opozitare që të jenë pjesë e negociatave”, tha ai.
Zgjidhja më e duhur, sipas Smajljaj, është një koalicion i gjerë mes partive.
“Zgjidhja më e shëndetshme do të ishte një bashkëpunim më i gjerë që do të krijonte një koalicion të gjerë, mes Vetëvendosjes dhe ndonjë prej partive më të mëdha, ose edhe me dy parti të tjera po e zëmë. Në rast se njëra parti e madhe nuk e mbërrin mjaftueshëm, mund të marrë edhe një parti tjetër. Besoj se kjo është ajo që i duhet aktualisht vendit, sepse tani më po e shohim këtë bllokadën dhe ngërçin gati dy vite pa institucione të rregullta”.
Se partitë duhet të bashkëveprojnë e thotë edhe profesori universitar, Mazllum Baraliu.
“I domosdoshëm është bashkëpunimi. Domosdoshmërisht duhet bashkëpunuar me dikë për ta zgjedhur presidentin, nuk zgjidhet presidenti, kot është rezultati që e arrin cilado parti, kot është konstituimi i Kuvendit dhe i qeverisë sepse duhet përsëri të shkojmë në zgjedhje të rej”, tha profesori universitar, Mazllum Baraliu.
Moszgjedhja e presidentit do t’i drejtonte sërish qytetarët te kutitë e votimit.
Mirëpo një gjë e tillë, konsiderohet se do t’i dëmtonte edhe më shumë partitë politike.
“Dalja më e vogël në përqindje e votuesve reflektohet pastaj në rezultat më shumë negativisht, pra më shumë te partia më e madhe, e mandej te këto të tjerat më të voglat më pak në përqindje dhe në cilësi, domethënë në numër të ulëseve në Kuvend. Prandaj ato do të dëmtohen substancialisht dhe mund ta vënë shtetin në rrezik, dhe kjo nuk nuk lejohet në asnjë mënyrë”, tha ia.
Sipas rezultateve preliminare, parti e parë nga zgjedhjet e 7 qershorit doli Vetëvendosje, duke marrë 42.47 për qind të votave, nga të cilat kanë mbetur pa numëruar votat me postë, ato me kusht dhe votat e personave me nevoja të veçanta.
