Koalicioni AAK – Nisma Socialdemokrate – Konservatorët – E30 dhe Ideal, ka bërë publike listën me emrat për deputetë që do të garojnë në zgjedhjet e 9 shkurtit.
Në njoftim nga AAK thuhet se bartës i kësaj liste është Ramush Haradinaj dhe sipas tyre është listë fituese.
“Me politikanë me përvojë, pjesëtarë nga shoqëria civile, njerëz të dëshmuar në udhëheqje e në sektorë jetikë për vendin, janë garanca më e fortë e përfaqësimit të zërit të qytetarit në Kuvendin e Kosovës. Të fokusuar në cilësinë e një përfaqësimi sa më dinjitoz, gjinor, rajonal e sektorial, Lista e Koalicionit të udhëhequr nga kandidati për Kryeministër dhe bartës i listës, Ramush Haradinaj, është Listë për Kosovën Fituese”, thuhet në njoftimin.
Ndryshe listën për deputetë e ka dorëzuar edhe LDK-ja.
Komisioni Qendror i Zgjedhjeve ka shtyrë afatin për aplikim të subjekteve politike për certifikim dhe për dorëzimin e listës së kandidatëve për deputetë për pjesëmarrje në Zgjedhjet për Kuvendin e Kosovës, të cilat do të mbahen më 9 shkurt 2025, deri në orën 23:59 të ditës së sotme, e mërkurë, 11 dhjetor 2024.
