Gati dhjetë ditë kanë kaluar nga mbajtja e zgjedhjeve lokale në Kosovë, derisa kanë mbetur edhe rreth 20 ditë deri tek balotazhi.
E në komunat ku do të ketë raund të dytë të zgjedhjeve kanë filluar bisedimet e partive politike për koalicione.
Një përpjekje për bashkëpunim po flitet që ka edhe për komunën e Suharekës.
Pasi të hënë, u bë publike një fotografi ku shihen bashkë kryetari i PDK-së në komunën e Skenderajt, Sami Lushtaku me Blerim Kuqin e Lidhjes Demokratike të Kosovës.
Ky takim u lexua si bashkëpunim i PDK-së dhe LDK-së në komunën e Suharekës.
Por këtë e mohoi Lushtaku, duke thënë se janë takuar rastësisht.
“Për besë jemi takuar me një vend në Prishtinë rastësisht, e kemi pirë një kafe, jemi miq që një kohë të gjatë, bile as që kemi diskutuar për çështje politike, tash u bo pak edhe zor me qëndru më dikon, por kjo është puna e gazetarëve që ju keni drejt me pyet dhe asgjë nuk prish ndonjë punë, por e vërteta është kjo. Ndoshta kemi qëndru jo ma shumë se 10 minuta ndoshta edhe ma pak, për çështjen e koalicioneve e bashkëpunimeve është kryetari i partisë, unë as që diskutojë, po kemi problem edhe me pi kafe me ndonjë shokë a mik për shkak të disa propagandave që po bëhen’’, ka thënë Lushtaku.
Televizioni ka provuar të marrë një qëndrim nga kandidati i Aleancës për Ardhmërinë e Kosovës, Bali Muharremaj për këtë fotografi por i njëjti nuk ka pranuar të komentoj.
Muharremaj, ka dal i pari me vota në raundin e parë në Suharekë.
E bisedime për marrëveshje pati edhe në Fushë Kosovë.
Madje nga Lidhja Demokratike e Kosovës, u bë publike marrëveshja me Nismën Socialdemokrate dhe Partinë Liberale Egjiptiane.
Marrëveshje bëri edhe Vetëvendosje me Aleancën për Ardhmërinë e Kosovës.
Kandidati i këtij subjekti, Valon Prebreza tha se po vazhdojnë takimet.
Por që nuk ka marrëveshje me asnjë parti dhe po pret edhe nivelin qendror thotë kandidati i Partisë Demokratike të Kosovës, Rrahim Tërnava.
“Nuk ka marrëveshje me asnjë parti politike dhe jemi në pritje të nivelit qendror, normal qe kemi biseduar me nivelin qendror, sepse ne e respektojmë”, ka thënë Tërnava.
Koalicion të hënën u arrit edhe në komunën e Vushtrrisë në mes kandidatit të Vetëvendosjes, Sylejman Mehollit dhe atij të LDK-së Xhafer Tahirit.
I pranishëm në marrëveshjen e nënshkruar ishte edhe kryeministri në detyrë, Albin Kurti.
Këtë koalicion nuk e përkrahën LDK-ja duke thënë se është qëndrim individual i Tahirit dhe jo i partisë.
