Këshilli për Mbrojtjen e të Drejtave dhe Lirive të Njeriut (KMDLNj) ka reaguar pas vdekjes së një të burgosuri nga Qendra Korrektuese e Dubravës, i cili ishte dërguar me urgjencë për trajtim në Spitalin e Pejës, por nuk arriti t’i mbijetojë gjendjes së rënduar shëndetësore.
Në reagim, KMDLNj thekson se ky rast tregon se sistemi shëndetësor në burgje nuk ka kapacitetet e nevojshme për trajtimin e rasteve serioze dhe se është e domosdoshme ndërtimi i një spitali brenda Shërbimit Korrektues të Kosovës.
Sipas tyre, pa infrastrukturë të posaçme dhe pa stimulim për profesionistët shëndetësorë, gjendja e personave të privuar nga liria nuk do të përmirësohet.
Këshilli thekson gjithashtu se problem madhor mbetet transporti i të burgosurve për trajtim, sidomos i atyre me rrezikshmëri të lartë, si dhe mungesa e kapacitetit pranues në institucionet publike shëndetësore.
Në fund, KMDLNJ shpreh shqetësim edhe për qëndrimin e gjykatave, të cilat, sipas tyre, shpesh refuzojnë kërkesat e arsyetuara për ndërprerjen e dënimit, edhe në rastet kur të burgosurit vuajnë nga sëmundje të pashërueshme. /teve1.info/
