Klinika e Onkologjisë dhe shërbimi i Emergjencës në Qendrën Klinike Universitare të Kosovës kanë pranuar sot një donacion të pajisjeve mjekësore nga organizata jo-qeveritare “Cicat”, i cili synon përmirësimin e kushteve të trajtimit dhe rritjen e kapaciteteve për menaxhimin e rasteve.
Pajisjet përfshijnë dy aparatura për ngrohjen e gjakut dhe disa karroca për bartjen e barnave.
Themeluesja e organizatës, Ermira Murati u shpreh e lumtur sepse kanë realizuar një donacion të rëndësishëm për klinikën.
“Sot është një ditë shumë e veçantë për ne sepse kemi realizuar një donacion shumë të rëndësishëm për Klinikën e Onkologjisë dhe Emergjencën. Ky donacion është rezultat i një bashkëpunimi shumë të mirë që kemi pasë gjatë rezidencës artistike që është mbajte tre ditë vitin e kaluar në kuadër të festivalit shliroj cicat, ku artistët kanë qenë të jashtëzakonshëm dhe automatikisht kjo është rezultat i të gjithë angazhimit të tyre që ka sjellë këtë donacion, por njëkohësisht duhet të japim një falënderim shumë të veçantë për komunitetit zyrtar në Zvicër për zemërgjerësinë e tyre, për mirënjohjen, për bashkëpunimin dhe për mikpritjen e jashtëzakonshme që kemi përjetu. Kemi pasur përpjekje intenzive për të qenë me 4 shkurt në Cyrih për ta realizuar ankandin, një punë intenzive prej anëtarëve të bordit, duke fillu nga Ridvan Ademit, prej Kaltrina Ajetit, me njëmend një angazhim shumë i çmueshëm dhe me një rezultat shumë të mirë”, tha ajo.
Dorëzimi është bërë në ambientet e QKUK-së, tek Klinika e Onkologjisë ku janë vlerësuar përfitimet që ky investim sjell në sektorin e përfshirë.
Me këtë rast është theksuar se pajisjet e reja do të kontribuojnë në përmirësimin e cilësisë së trajtimit dhe rritjen e mundësive për ndërhyrje të shpejta në raste emergjente.
Sipas drejtorit të Klinikës së Onkologjisë, Ilir Kurteshi, këto pajisje do të përdoren për të lehtësuar punën e stafit mjekësor dhe për të ofruar shërbime më efikase për pacientët me diagnoza të rënda. Duke lehtësuar kështu edhe shpenzimet për familjarët.
“E falënderoj organizatën në fjalë për këtë të mirë që e ka bërë dhe për këtë donacion të cilën Klinika e Onkologjisë e mirëpret dhe është në vazhdën e donacioneve që klinika fiton nga shoqatat e ndryshme, shoqëria civile dhe njerëz të vullnetit të mirë që pacientët tanë në Klinikën e Onkologjisë përpos trajtimeve që bëhen dhe investimeve të shumta nga Ministria e Shëndetësisë, SHSKUK, të mirren dhe disa donacione të cilat e lehtësojnë punën e infermierëve tanë dhe e bëjnë trajtimin më të çasshëm.”
Ky hap shihet si pjesë e një procesi më të gjerë modernizimi të infrastrukturës mjekësore, me fokus në përmirësimin e shërbimeve në fushat ku nevoja është më e theksuar.
