ShSKUK-ja ka mohuar pretendimet e familjarëve të cilët kanë akuzuar Klinkën e Nefrologjisë – Shërbimin e Dializës se pacientit nuk i ishte realizuar dializa, raporton teve1.info
Sipas ShSKUK-së, pacenti F.S, ka qenë në program kronik të dializës, teksa kanë thënë se gjatë qëndrimit të pacientit në Klinikën e Kirurgjisë Torakale të njëjtit i ishin realizuar seancat e rregullta të dializës në Klinikën e Nefrologjisë.
“Në lidhje me raportimet në medie për rastin e djeshëm, të pacientit F.S., në Klinikën e Kirurgjisë Torakale, e ku familjarët e pacientit, në medie, kanë akuzuar Klinikën e Nefrologjisë- Shërbimin e Dializës, se pacientit nuk i ishte realizuar Dializa, Klinika Nefrologjisë në QKUK, sqaron se pacienti F.S., ka qenë në program kronik të Dializës. Gjatë qëndrimit në Klinikën e Kirurgjisë Torakale, pacienti kishte realizuar seancat e rregullta të dializës në Klinikën e Nefrologjisë. Vetëm javën e fundit ka realizuar disa dializa të rregullta”, thuhet në njoftim.
Tutje në njoftim thuhet se pacienti më 8,10, 12 dhe 13 janar të këtij viti kishte refuzuar të realizoj dializën, ndërsa më 14 janar i njëjti ka realizuar dializën që ka zgjatur katër orë sipas protokollit mjekësor.
“Me datë 8 janar 2023, me 10 janar 2023, 12 janar 2023, ditën e premte, 13 janar 2023, ka refuzuar të realizojë seancën e dializës, ndërsa ditën e shtunë, 14 janar 2023 ka realizuar seancën e plotë të Dializës e cila zgjatë 4 orë, sipas protokollit mjekësor. Pacientët kronik dializohen 3 herë nga 4 orë në javë, kurse pacienti në fjalë të shtunën ka realizuar seancën e plotë, 4 orë”, thuhet në njoftim.
E për këtë rast ka dhënë detaje për teve1.info edhe Policia e Kosovës.
Zëdhënësja për rajonin e Prishtinës, Flora Ahmeti ka thënë se së bashkë me prokurorinë po punohet për të sqaruar rrethanat lidhur me ngjarjen.
Ndërkaq, në raportin 24-orësh të Policisë së Kosovës është njoftuar se rasti është iniciuar si “Vetëvrasje”.
“Një burrë ka vdekur si pasojë e lëndimeve të pësuara pasi është hedhur nga dritarja, derisa ishte në mjekim në QKUK” – thuhet në njoftim./teve1.info
