Kandidati i Lëvizjes Vetëvendosje për deputet, Avdullah Klinaku, është shprehur i bindur se subjekti i tij politik do të dalë i pari në zgjedhjet parlamentare që do të mbahen më 28 dhjetor.
Klinaku ka deklaruar se këtë bindje e mbështet në entuziazmin e qytetarëve, si brenda vendit ashtu edhe në diasporë.
Në emisionin “Ditari” në Tëvë1, ai ka theksuar se partitë opozitare kanë treguar mungesë vizioni politik, duke i konsideruar zgjedhjet si zgjidhje për ngërçin politik.
Sipas tij, duke pasur parasysh rezultatin e mëparshëm zgjedhor, ku Vetëvendosje kishte prirje me 42 për qind, opozita nuk ka ofruar ndonjë ndryshim përmbajtësor që do të mund të përmbyste këtë rezultat.
“Brenda kaq pak muajsh, pa një vizion të qartë, të insistosh për të shkuar në zgjedhje, nuk e di mbi çfarë premise presin rezultat pozitiv partitë opozitare. Nuk shoh asnjë mundësi për përmbysje të rezultatit. Besoj se LVV-ja do të jetë partia e parë”, ka deklaruar Klinaku.
Sa i përket koalicioneve paszgjedhore, Klinaku ka theksuar se kjo çështje do të diskutohet vetëm pas publikimit të rezultateve përfundimtare të zgjedhjeve.
“Këto çështje trajtohen pas daljes së rezultatit publik. Çdo parti ka organet e veta që shqyrtojnë rrethanat dhe marrin vendime në përputhje me interesin e vendit”, ka përfunduar ai.
