Ushtruesi i detyrës së kryetarit të OVL-UÇK-së Faton Klinaku ka reaguar pasi që nënkryetari i Komunës së Skenderajt, Sami Lushtaku, mbrëmjen e sotme është ftuar në zyrat e EULEX-it në Fushë Kosovë.
Ai ka thënë se përveç “spektakleve të vazhdueshme që po bëhen nga kjo pseudogjykatë, të ndalohet njeriu në rrugë pa kurrfarë paralajmërimi, kjo është edhe një poshtërsi e tyre e radhës”.
“Siç po raportohet në media, Specialja e paska ndaluar në këto orë të vona z. Sami Lushtaku. Përveç spektakleve të vazhdueshme që po bëhen nga kjo pseudogjykatë, të ndalohet njeriu në rrugë pa kurrfarë paralajmërimi, kjo është edhe një poshtërsi e tyre e radhës”, ka shkruar ai.
Ndryshe, Lushtaku mbrëmjen e sotme është ftuar në zyrat e EULEX-it në Fushë Kosovë.
Kështu kanë bërë të ditura burime për teve1.info nga Komuna e Skenderaj.
Të njëjtat thanë se për momentin nuk dihet pse është ndaluar Lushtaku dhe se nuk kanë kontaktuar me të.
Kujtojmë se gjatë ditës së djeshme Gjykata Speciale ka bastisur shtëpinë e ish-eprorit të Ushtrisë Çlirimtare të Kosovës, Sylejman Selimi.
Lidhur me këtë Artan Qerkini, avokat i Selimit, tha se bastisja u krye nën dyshimin se ka prova për pengim të administrimit të drejtësisë, porse klienti i tij nuk është i dyshuar.
Avokati Qerkini u ankua për shkelje të të drejtave kushtetuese të Selimit. Ndërkaq, ai paralajmëroi ankesë për urdhrin e Gjykatës. /teve1.info/
