Kryetari i Klubit Politik “Demokracia Konservatore”, Abdullah Klinaku, thotë se Projektligji për Shëndet Riprodhues dhe Fertilizim të Asistuar ka dispozita që cenojnë vlerat e familjes.
Klinaku thotë se duhet të ketë kujdes në aprovimin dhe miratimin e këtij Projektligji, që sipas tij për shkak të keqpërdorimit.
“Jemi përpjekur që edhe në tentativat e mëhershme kur është provuar që të aprovohet në lexim të parë ky draft ligj, kemi ngritur shqetësimin tonë se ky draft ligj ka dispozita, të cilat cenojnë disa prej vlerave tona fundamentale të familjes dhe në të njëjtën kohë ka në tërësi dispozita që duhet pasur kujdes në aprovimin dhe miratimin e tyre për shkak të mundësisë së keqpërdorimit në vendin tonë”, tha ai në emisionin “Info Nata” në Tëvë1.
Klinaku thotë se mundësia e fekondimit artificial te një vajzë që nuk është në çift, mund të shkaktojë pasoja për familjen.
“Konsideroj që ky ligj, që përmes tij krijohet mundësia që çdo vajzë që mbush 18 vite përmes fekondimit artificial të ketë fëmijë, pa marrë parasysh kushtet ose rrethanat ose gatishmërinë e saj, ose pjekurinë e saj në kuptim të familjes për shkak që nuk është kusht që të jetë çift, mund të jetë vetëm si individë, atëherë mendojmë qe kjo formë mund të shkaktojë pasoja dhe si mundësi e tillë një lejes e tillë që aprovohet përmes këtij ligji shkakton pasoja për familjen dhe në të njëjtën kohë lejon mundësi të keqpërdorimeve të shumta”, deklaroi ai.
Sipas rregullores së Qeverisë së Kosovës ky ligj rregullon organizimin, funksionimin, rolin dhe përgjegjësinë institucionale dhe profesionale, mbikëqyrjen, inspektimin, për kujdesin shëndetësor të sigurt dhe cilësor që ofrohet në fushën e shëndetit riprodhues, me qëllim të ruajtjes, promovimit, përmirësimit të të drejtave të shëndetit seksual dhe riprodhues.
“Me këtë ligj rregullohet kujdesi shëndetësor, procedurat e fertilizimit të asistuar mjekësor, realizimi dhe këshillimi për këto procedura si e drejtë riprodhuese e individit kur nuk arrihet shtatzëni e dëshiruar me rrugë natyrore”, thuhet në Platformën e Konsultimeve Publike./teve1.info/
