Klinaku ka thënë se pasi ta shqyrtojnë propozimin, do i kthejnë Kurtit përgjigje me shkrim, përcjell teve1.info
“Aplikimi, vlerësimi dhe verifikimi i veteranëve është bërë mbi bazë të ligjit. Për çdo shkelje të ligjit janë organet kompetente, dhe pas thirrjeve tona, ka filluar proces gjyqësor dhe lënda është në gjykatë.Deri sa të bëhet ligj i ri, vlen ligji i vjetër, pra duhet të rritet paga minimale në Kosovë e krahas saj edhe beneficioni i veteranit që lidhet me të.Ligj i ri për vlerësim e verifikim, përveç dosjeve që janë në prokurori e nuk ka se si bëhet, është edhe ndërhyrje në procesin gjyqësor. Por, pasi ta shqyrtojmë, gjithsesi do t’i kthejmë përgjigje me shkrim”, ka shkruar ai në Facebook.
Kryeministri Kurti u ka propozuar veteranëve që të fillojë hartimi i një ligji të ri, i cili e nis një proces të vlerësimit dhe verifikimit të të gjithë pjesëmarrësve të luftës çlirimtare.
Ndërkaq, derisa të përfundojë ky proces, Kurti ka propozuar që t’u subvencionojë një pjesë të pagës së veteranëve për një periudhë të caktuar.
Më 17 qershor, përfaqësuesit e OVL-UÇK-së kishin zhvilluar takim, një ditë pas protestës së veteranëve para oborrit të Kuvendit për shkak të mospërfshirjes së tyre në Projektligjin për pagën minimale. Pas atij takimi, Klinaku kishte bërë të ditur se nuk kishin arritur një dakordim, por që Kurti u kishte thënë se do u propozonte diçka me shkrim. /Teve1.info/
https://teve1.info/lajmet/kurti-u-propozon-ligj-te-ri-te-verifikimit-dhe-perkrahje-ne-punesim-veteraneve/
