Kandidati për deputet nga Lëvizja Vetëvendosje, Abdullah Klinaku, ka deklaruar se pas 28 dhjetorit partia e tij synon t’i formojë vetë institucionet e vendit, duke u mbështetur, sipas tij, në vullnetin e qytetarëve.
Klinaku ka theksuar se politika dhe fushata elektorale e LVV-së janë të qarta dhe të fokusuara në kërkesën e qytetarëve për një qeverisje pa koalicione.
“Për momentin është shumë e qartë politika edhe fushata elektorale e LVV-së. Është e përqendruar në kërkesën e qytetarëve që pas 28 dhjetorit, LVV-ja do t’i formojë vetë institucionet”, deklaroi ai në emisionin “Mesditë” në Tëvë1.
Ndërkohë, duke komentuar kritikat lidhur me ndarjen e shtesave prej 100 eurosh për fëmijët dhe pensionistët një ditë pas zgjedhjeve, Klinaku ka deklaruar se reagimet janë të pritshme, por sipas tij këto masa janë në interes të qytetarëve.
Ai ka shtuar se përfitimet sociale, sado të vogla, janë të rëndësishme dhe forcojnë bindjen se qeveria duhet të jetë për të gjithë.
“Është normale që me pas kritika. Në fund të fundit edhe ata duhet me i gjet disa mundësi për me mirëmbajt vetën te elektorati i vet. Mirëpo, me përfitimin qytetar mendoj se kjo është një mundësi shumë e mirë edhe një përfitim sado i vogël për të gjithë qytetarët tonë. Kjo vetëm e forcon bindjen e atyre që Qeveria është e të gjithëve dhe prej saj duhet përfituar gjithë. Pra, shtesat për fëmijë, pensionet, subvencionimi për lehona dhe kategorive tjera – ka qenë një politikë e kësaj Qeverie që i ka mbështet përgjatë këtyre katër viteve”, deklaroi ai. /teve1.info/
