Kombëtarja e Kosovës e gati se e ka siguruar plotësisht vendin e dytë në tabelë në Grupin B, për kualifikimet e Kupës së Botës.
Me fitoren ndaj Suedisë, “Dardanët” i kanë 7 pikë, tri më pak se liderja Zvicra, por katër më shumë se Sllovenia e treta në grup.
E realisht, pozita e dytë është më e kapshme dhe më e logjikshme për ekipin e Franco Fodës.
Por, si mund të shkojë Kosova në Botëror përmes “play-off”-it?
Në fazën e grupeve, 12 skuadrat që përfundojnë në vendin e dytë kualifikohen në barazh, në këtë rast edhe ekipi i jonë kombëtar.
Përveç këtyre 12 Kombëtareve, 4 skuadra shtesë do të zgjidhen nga ato që kanë qenë fitues grupesh në UEFA Nations League 2024/25, por që nuk arritën të përfundojnë në vendin e parë apo të dytë në grupin e kualifikimeve.
Këto 16 skuadra (12 vendet e dyta + 4 nga Liga e Kombeve) do të ndahen në 4 rrugë në play-off, secila rrugë me nga 4 skuadra.
Në çdo rrugë të barazhit do të luhen nga dy raunde (nga një ndeshje): gjysmëfinale dhe finale.
Fituesi i finales në atë rrugë do ta presë biletën për në Botëror.
Pra, nga çdo rrugë e “play-off”-it në Botëror shkon nga një Kombëtare dhe në total 4 ekipe do të kualifikohen përmes “play-off”-it nga Evropa.
