Albert Kinolli nga Partia Rome e Bashkuar beson se drejtësia do të vie në vend dhe Gjykata Kushtetuese do të vendos në favor të tij dhe Veton Berishës nga Partia Liberale Egjiptiane, në lidhje me ankesën e tyre për dyshimet për orkestrimin e votave nga ana e partisë Iniciativa Rome dhe Listës Serbe në vendbanimet me shumicë serbe në zgjedhjet e 14 shkurtit 2021, si rezultat i të cilave ai beson se së bashku me Berishën kanë mbetur jashtë Kuvendit.
Ai thotë se një rast i tillë nuk ka ndodhur më parë në historinë e Kosovës, dhe si i tillë është “sui generis”.
“Ne i jemi drejtuar së pari PZAP-së dhe Gjykatës Supreme, edhe pse ky rast mund të themi me plot gojë që është një rast sui generis, për shkak se më herët në historinë e re të Kosovës, një precedent i tillë nuk ka ndodhur asnjëherë, mirëpo me angazhimin e Listës Serbe është krijuar në momentet e fundit ashtu të themi gjatë natës, një iniciativë qytetare rome…ne kemi deponuar fakte edhe në PZAP, edhe në Supreme, dhe në Gjykatë Kushtetuese, kemi dërguar mesazhe me screenshot ku njerëzve iu ka cenu e drejta e tyre për një votë të lirë dhe kanë qenë në presion”, deklaroi ai në “Ditari” në Tëvë 1.
Kinolli bën të ditur se edhe pse procesi është stërzgjatur për dy vite, nga Kushtetuesja kanë marrë përgjigje me shkrim, ku u kanë thënë se lënda është paksa e koklavitur dhe duke u shqyrtuar me prioritet.
Sipas tij, drejtësia vonon, por nuk harron.
“Po gjithsesi ne mos të kishim qenë bindës që do del në favorin tonë, as nuk e kishim parashtruar këtë ankesë, mirëpo ne jemi bazuar në gjendjen faktike, dhe kemi deponuar ankesat tona. Ne jemi sigurt që drejtësia vonon, por nuk harron dhe jemi të sigurt që vendimi do të del në favorin tonë. Mirëpo se çfarë përmban në vete ky vendim dhe kujt do t’i drejtohet dhe kush do të udhëzohet që të veprojë në të ardhmen me vendimin e Gjykatës Kushtetuese, kjo pritet në ditët të shikohet në ditët në vijim”, shtoi ai. /Teve1.info/
