Publicisti i njohur Kim Mehmeti ka kritikuar ashpër qëndrimin e zyrtarëve shqiptarë, sidomos në Kosovë, për heshtjen ndaj asaj që po ndodh në Rripin e Gazës. Në emisionin “Këndi i Debatit” në Tëvë1, ai tha se gjenocidi në Gaza është tashmë fakt i konfirmuar edhe nga organizata humanitare izraelite, por se shqiptarët dhe arabët vazhdojnë të heshtin.
“Sot, ai që është pro Izraelit në këto rrethana, kur bëhet fjalë për gjenocidin në Gaza, ai ka një problem me njerëzoren, jo me politikën”, u shpreh Mehmeti.
Ai vlerësoi se Shqipëria ka mbajtur një qëndrim më korrekt në raport me konfliktin Palestinë-Izrael, duke kujtuar se ka njohur Palestinën dhe nuk është distancuar prej saj. Sipas tij, ndryshe sillet Kosova, e cila “refuzon ta shohë realitetin në Gaza”.
“Shqipëria e ka njohur Palestinën dhe nuk është distancuar kurrë nga ajo. Ndërsa Kosova sillet sikur nuk do të dëgjojë apo të shohë çfarë po ndodh në Gaza. As nuk e quan gjenocid, as shfarosje”, tha Mehmeti.
Ai përmendi edhe dy organizata të njohura izraelite për të theksuar se tashmë ekziston një konsensus më i gjerë për përmasat tragjike të konfliktit në Gaza.
“Dy organizata shumë të njohura izraelite humanitare e kanë shpallur zyrtarisht gjenocid atë që po ndodh në Gaza. Vetëm shqiptarët dhe arabët nuk e thonë këtë. Ne heshtim sepse në masë të madhe jemi interesxhinj”, theksoi ai.
