Publicisti Kim Mehmeti, në emisionin “Këndi i Kimit” në Tëvë1, ka folur për 20-vjetorin e vdekjes së ish-Presidentit të Kosovës, Dr. Ibrahim Rugova, duke vlerësuar rolin e tij historik dhe rëndësinë që kishte prania e tij në krye të vendit në një periudhë vendimtare për shqiptarët.
Mehmeti ka theksuar se, sipas mendimit të tij, truri politik i Lidhjes Demokratike të Kosovës nuk ishte Ibrahim Rugova, por Fehmi Agani, ndërsa ka shtuar se Rugova ishte personaliteti i duhur në kohën e duhur.
“Për mua, truri i LDK-së nuk ka qenë Ibrahim Rugova, por Fehmi Agani. Megjithatë, në histori ndodh që personalitetet të përputhen me kohën. Nëse në momentin e duhur je në vendin e duhur, kjo bëhet vendimtare”, ka deklaruar Mehmeti.
Ai ka treguar se pozita e presidentit u ishte ofruar edhe figurave të tjera publike para Rugovës, por ato nuk e kishin pranuar.
“E di që ky post u është ofruar edhe Rexhep Qosjes për kryetar, por nuk ka pranuar. Ka pasur edhe emra të tjerë që nuk e kanë pranuar. Në atë kohë, Rugova ishte ai që e mori përsipër këtë barrë”, ka thënë Mehmeti.
Duke folur për karakterin dhe stilin e udhëheqjes së Rugovës, Mehmeti ka vlerësuar durimin, qetësinë dhe komunikimin e tij të vazhdueshëm me publikun dhe mediat.
“Rugova kishte cilësi të mira. Ishte shkrimtar i mirë dhe mbi të gjitha kishte durim. Ai çdo të premte mbante takime me gazetarët dhe përsëriste vazhdimisht se Kosova do të bëhej dhe se çështja e saj ishte në agjendën ndërkombëtare. Kjo qetësi dhe këmbëngulje për ne shqiptarët ishte fat”, ka theksuar Mehmeti.
Në fund, ai ka shtuar se prania e Ibrahim Rugovës në krye të Kosovës, me qasjen e tij të qetë dhe paqësore, rezultoi të ishte shumë e favorshme për shqiptarët në rrethana jashtëzakonisht të vështira historike.
