Publicisti Kim Mehmeti ka reaguar ndaj deklaratave të Nafi Cegranit, i cili këto ditë në një emision në Kosovë e akuzoi se Mehmeti kishte punuar për UDB-në.
Në një intervistë për emisionin “Këndi i Kimit” në Tevë1, Mehmeti e ka mohuar kategorikisht këtë akuzë dhe ka komentuar mënyrën se si janë bërë këto pretendime:
“Betohem në fëmijët që fare nuk më bëri përshtypje, por më ka bërë përshtypje se si është e mundur që dikush të ulet e të thotë se unë kam punuar deri në vitin 1990 dhe kam marrë rrogë aty”, ka thënë Mehmeti.
Ai gjithashtu ka ironizuar deklaratën e Cegranit dhe mënyrën se si janë shpërndarë akuzat:
“Ky që e tha ka punuar edhe ka marrë rrogë në UDB. Sepse menjëherë, si të fillet për këta njerëz, fillojnë: ‘A e dëgjove çfarë tha për Kim-in? A nuk pyesin se kush është ai që ka folur?’”, ka shtuar Mehmeti.
Publicisti ka theksuar se nuk e ka prekur personalisht deklarata, por e shqetëson mënyra se si përhapet informacioni i paqartë dhe i pavërtetë:
“Unë e kam dëgjuar në shumë emisione, vetëm show, dhe këta që kanë punuar me UDB botuan libra dhe u ngutën, sepse sot e kësaj dite Beogradi i di dosjet tona”, ka deklaruar Mehmeti.
