Në episodin e së enjtes, më 30 tetor, të serialit “The Kardashians”, Kim Kardashian ndezi polemika të reja me një deklaratë që la publikun pa fjalë. Ajo pranoi se nuk beson se njeriu ka zbritur ndonjëherë në Hënë në vitin 1969.
Gjatë xhirimeve të serialit në setin e “All’s Fair”, Kim i tha bashkëprotagonistes Sarah Paulson: “Po të dërgoj miliona artikuj me Buzz Aldrin dhe… tjetrin,” duke iu referuar Neil Armstrong-ut. Paulson iu përgjigj me humor: “Po, dërgoji,” ndërsa Kim filloi të shpjegonte një nga videot që kishte dërguar.
“Sipas një interviste, e pyesin Buzz-in cili ishte momenti më i frikshëm, dhe ai thotë: ‘Nuk kishte moment të frikshëm, sepse nuk ndodhi. Mund të kishte qenë, por nuk ndodhi,’” tregoi Kim.
Sipas saj, astronauti “është plakur dhe i dalin të vërtetat pa dashje.”
Në rrëfimin për kamerën, Kardashian pranoi se dëgjon “teori konspirative gjatë gjithë kohës” te Paulson dhe sfidoi publikisht versionin zyrtar të historisë.
“Nuk mendoj se e kemi bërë. Mendoj se ishte e sajuar,” tha ajo, duke shtuar se ka parë video ku Aldrin “e pranon” që misioni nuk ndodhi.
Sipas Kim, disa detaje e kanë bindur plotësisht: “Pse flamuri valëvitet kur nuk ka gravitet? Pse shenjat e këpucëve në muze janë ndryshe nga ato në foto? Dhe pse nuk ka yje në asnjë imazh?”
E ndërgjegjshme për reagimet që do të shkaktonin fjalët e saj, Kim u përgjigj qetësisht ndaj skepticizmit: “Do të më quajnë të çmendur sido që të jetë. Por, hyni në TikTok dhe shikoni vetë.”
